ജില്ലാകളക്ടർക്ക് പരാതികൾ നേരിട്ട് നൽകുന്നതിന് ഓണ്‍ലൈന്‍ സംവിധാനം സജ്ജമാക്കി കേരള സംസ്ഥാന ഐ.ടി മിഷന്‍. കടലാസ് രഹിതമായി ഓണ്‍ലൈന്‍ സംവിധാനത്തിലൂടെ പൊതുജനങ്ങൾക്ക് സേവനം വേഗത്തിൽ ലഭ്യമാകുന്ന ഡിസി കണക്ട് പദ്ധതിക്ക് തുടക്കമായി. ഡിസി കണക്ട് പദ്ധതിയിലൂടെ, പൊതുജനങ്ങൾക്ക് edistrict.kerala.gov.in എന്ന സൈറ്റിൽ അക്ഷയ കേന്ദ്രങ്ങളിലൂടെയോ സ്വന്തമായി അക്കൗണ്ട് ഉണ്ടാക്കി ലോഗിന്‍ ചെയ്തോ പൊതുജനങ്ങള്‍ക്ക് പരാതികള്‍ നല്‍കാം.(DC Connect Scheme – Now online system to submit complaints directly to the District Collector)

വിവിധങ്ങളായ 80 വിഷയങ്ങൾ പരാതി ഇനത്തിൽ തെരഞ്ഞെടുക്കാനും സാധിക്കും. പരാതിയുടെ പൂർണ്ണ വിവരങ്ങളും, ഉള്ളടക്കം ചെയ്യാനുള്ള രേഖകളും പോർട്ടലിൽ അപ്ലോഡ് ചെയ്യാം. ഉപഭോക്താക്കൾക്ക് സ്വന്തമായോ അക്ഷയ കേന്ദ്രങ്ങൾ വഴിയോ പരാതി സമർപ്പിക്കാം. അക്ഷയ കേന്ദ്രങ്ങൾ വഴി സമർപ്പിക്കുന്ന പരാതിക്ക് 35 രൂപ ഈടാക്കും. പരാതികൾ കളക്ടറേറ്റിലെ പബ്ലിക് ഗ്രീവൻസ് സെല്ലിലെ ക്ലാർക്കിനാണ് ആദ്യം എത്തുന്നത്. ക്ലാർക്ക് ജൂനിയർ സൂപ്രണ്ടിനും, ജൂനിയർ സൂപ്രണ്ട് കളക്ടർക്കും നൽകി പരിശോധിച്ച ശേഷം പരാതികൾ അതാത് വകുപ്പുകൾക്ക് അയച്ചു നൽകും. പരാതികളുടെ നില അപേക്ഷകർക്ക് വിലയിരുത്താൻ സാധിക്കും. പരാതി സമർപ്പിച്ചതിനു ശേഷം 28 ദിവസത്തിനകം ഉപഭോക്താവിന് മറുപടി ലഭിക്കും. പോർട്ടൽ വഴി ലഭിക്കുന്ന പരാതികൾ, പൊതുജന പരിഹാര സെൽ അധികാരി പരിശോധന വിധേയമാക്കി, ജില്ലാ കളക്ടർക്ക് കുറിപ്പോടുകൂടി കൈമാറും. ലഭിച്ച പരാതികൾ അനുബന്ധ വകുപ്പുകൾക്ക് കൈമാറി പരിഹാര പ്രക്രിയ നടപ്പിലാക്കാനുള്ള നിർദ്ദേശം ജില്ലാ കലക്ടർ നൽകും. ഉപഭോക്താവിന് ലഭിച്ചിരിക്കുന്ന മറുപടി തൃപ്തികരമല്ലെങ്കിൽ, ആദ്യം അയച്ച പരാതി രജിസ്റ്റർ നമ്പർ ഉപയോഗിച്ച്, പരാതി പുനർ സമർപ്പിക്കാം. പുനർ സമർപ്പിക്കപ്പെടുന്ന പരാതികളിൽ കലക്ടർ നേരിട്ട് ഹിയറിങ് നടപടികൾ സ്വീകരിച്ചു ഉപഭോക്താവിന് മറുപടി നൽകും.

ലഭിച്ച പരാതികൾ പരിശോധനയ്ക്ക് വിധേയമാക്കി, അന്വേഷണ നടപടികൾക്ക് ശേഷം, ആക്ഷൻ ടേക്കൺ റിപ്പോർട്ട് (ATR) തയ്യാറാക്കി ഉപഭോക്താവിന് മറുപടി നൽകണം. വകുപ്പ് തല തീരുമാനങ്ങൾ കൈക്കൊള്ളാൻ സാധിക്കാത്ത വിഷയങ്ങളിൽ, കാരണം സഹിതം ജില്ലാ കലക്ടറെ അറിയിക്കണം. മറ്റൊരു വകുപ്പാണ് പ്രശ്ന വിഷയത്തിൽ തീരുമാനം കൈക്കൊള്ളേണ്ടത് എങ്കിൽ, ആ വകുപ്പിലെ വിവരങ്ങളും, ഫയൽ നമ്പർ, തീരുമാനം കൈക്കൊള്ളേണ്ട ഉദ്യോഗസ്ഥരുടെ പേര് വിവരങ്ങൾ എന്നിവ മറുപടിയിൽ ഉൾപ്പെടുത്തണം. ഉപഭോക്താവിന് നൽകുന്ന മറുപടിയിൽ, പ്രശ്‌നപരിഹാരം തൃപ്തികരമല്ലെങ്കിൽ, പരാതി പുനർ സമർപ്പിക്കാൻ സാധിക്കുന്നതാണ് എന്ന വിവരം കൃത്യമായി രേഖപ്പെടുത്തണം.