കാസർകോഡ് :കോവിഡ് 19 സമൂഹ വ്യാപനം തടയാന്‍ പഴുതടച്ച പ്രവര്‍ത്തനങ്ങളുമായി ആരോഗ്യ വകുപ്പ്. സമൂഹ വ്യാപനം നടന്നിട്ടുണ്ടോ എന്ന വിവര ശേഖരണത്തിനായി ജില്ലയിലെ ഹോട്ട് സ്‌പോട്ടുകളായ ആറ് പഞ്ചായത്തുകളിലും കാസര്‍കോട് നഗരസഭയിലും കോവിഡ് 19 ഇതുവരെയും റിപ്പോര്‍ട്ട് ചെയ്തിട്ടില്ലാത്ത തൃക്കരിപ്പൂര്‍ പഞ്ചായത്തിലുമാണ് പഠനം നടത്തുന്നത്. ഇതിനായി ജില്ലയിലെ കോവിഡ് ബാധിതമല്ലാത്ത പ്രദശങ്ങളില്‍ നിന്നുള്ള ജൂനിയര്‍ പബ്ലിക്ക് ഹെല്‍ത്ത് നേഴ്‌സുമാര്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാര്‍ എന്നിവരും ആശാവര്‍ക്കര്‍മാരും വീടുകള്‍ കയറിയിറങ്ങി വിവരങ്ങള്‍ ശേഖരിക്കുകയാണ്. ഹോട്ട് സ്‌പോട്ടുകളില്‍പെട്ട വീടുകളില്‍ സര്‍വ്വേ നടത്തി കോവിഡ് സമാനമായ അസ്വസ്ഥകള്‍ നേരിടുന്നവരെ ആശുപത്രികളിലേക്ക് മാറ്റുകയുമാണ് ചെയ്യുന്നത്. ഏപ്രില്‍ 13 ന് ആരംഭിച്ച പ്രവര്‍ത്തനത്തിലൂടെ 16 വരെയായി 250 പേരുടെ സാമ്പിള്‍ ശേഖരിച്ചു. ഇതില്‍ 100 സാമ്പിളുകളുടെ പരിശോധനാ ഫലം നെഗറ്റീവായിരുന്നു. ആറ് ദിവസത്തെ വിവരശേഖരണം പൂര്‍ത്തിയാകുമ്പോള്‍ ജില്ലയുടെ ചിത്രം വ്യക്തമാകുമെന്ന് ഡി.എം.ഒ ഡോ. എ.വി രാംദാസ് പറഞ്ഞു. സംസ്ഥാനത്ത് ഏറ്റവും കൂടുതല്‍ കോവിഡ് 19 രോഗികളെ കണ്ടെത്തിയ സാഹചര്യത്തിലാണ് ജില്ലയില്‍ പ്രത്യേക കര്‍മപദ്ധതി ആവിഷ്‌ക്കരിച്ച് (കെയര്‍ ഫോര്‍ കാസര്‍കോട്) സര്‍വേ നടത്തുന്നത്.
ജില്ലയില്‍ രോഗികളുടെ എണ്ണം കുറയുന്നു
ജില്ലയില്‍ കോവിഡ് 19 പോസിറ്റീവ് കേസുകള്‍ കുറയുന്നു. ജില്ലയില്‍ 11000 പേരായിരുന്നു നിരീക്ഷണത്തിലുണ്ടായിരുന്നത്. എന്നാല്‍ ഇപ്പോള്‍ നിരീക്ഷണത്തിലുള്ളവരുടെ എണ്ണം 8000 ആയി ചുരുങ്ങിയതായി ജില്ലാ സര്‍വ്വലന്‍സ് ഓഫീസര്‍ ഡോ. എ.ടി. മനോജ് പറഞ്ഞു. ആരോഗ്യ വകുപ്പ് ജീവനക്കാരോടൊപ്പം പൊലീസും ജില്ലാ കളക്ടറുടെ നേതൃത്വത്തില്‍ വിവിധ വകുപ്പുകളുടെ ഏകോപനവും പൊതുജനങ്ങളുടെയും രോഗബാധിത പ്രദേശങ്ങളില്‍ നിന്നെത്തിയവരുടെയും സഹകരണവും ജില്ലയില്‍ രോഗികളുടെ എണ്ണം കുറയുന്നതില്‍ വലിയ പങ്ക് വഹിച്ചിട്ടുണ്ട്.
ജില്ലയില്‍ പോസിറ്റീവ് കേസുകള്‍ റിപ്പോര്‍ട്ട് ചെയ്ത് കഴിഞ്ഞാല്‍ ഉടന്‍ അവരുടെ പ്രാഥമിക സമ്പര്‍ക്ക വിവരം ശേഖരിക്കും. ഇതിലൂടെ ലഭിക്കുന്നവര്‍ക്ക് രോഗ ലക്ഷണമുണ്ടോ എന്ന് നോക്കാതെ തന്നെ അവരുടെ സാമ്പിളുകള്‍ പരിശോധനയ്ക്ക് അയക്കും. രോഗികളുടെ പ്രൈമറി സെക്കണ്ടറി കോണ്ടാക്റ്റുകള്‍ കണ്ടെത്താന്‍ ജില്ലാ മെഡിക്കല്‍ ഓഫീസില്‍ കണ്‍ട്രോള്‍ റൂം പ്രവര്‍ത്തിക്കുന്നുണ്ട്. പരിശീലനം ലഭിച്ച നാല് ജീവനക്കാരാണ് ഇതിനായി പ്രവര്‍ത്തിക്കുന്നത്. രോഗികളുമായുള്ള കോണ്‍ടാക്റ്റിലൂടെ നിരീക്ഷണത്തില്‍ കഴിയുന്നവര്‍ക്കായി ജില്ലാ ആശുപത്രിയിലും സ്വകാര്യ ആശുപത്രികളിലുമെല്ലാം സൗകര്യം ഒരുക്കി. സ്വകാര്യ ആശുപത്രികളില്‍ സര്‍ക്കാര്‍ ആശുപത്രികളുടെ മേല്‍നോട്ടത്തിലായിരിക്കും നിരീക്ഷണത്തില്‍ കഴിയുന്നത്. രോഗം സ്ഥിരീകരിച്ചവര്‍ക്കും നിരീക്ഷണത്തില്‍ കഴിയുന്നവര്‍ക്കും ആവശ്യമായ കൗണ്‍സിലിങ് നല്‍കുന്നുണ്ട്
0 Comments