തിരുവനന്തപുരം: തിരുവനന്തപുരം സ്വര്‍ണ്ണക്കടത്ത് കേസിൻ്റെ അന്വേഷണ ചുമതല സി.രാധാകൃഷ്ണ പിള്ളയ്ക്ക് . എന്‍ഐഎ കൊച്ചി യൂണിറ്റ് ഡിവൈഎസ്പി ആണ് രാധാകൃഷ്ണപിള്ള. എൻഐഎ കൊച്ചി ഓഫീസ് കേന്ദ്രീകരിച്ചായിരിക്കും കേസിൽ അന്വേഷണം നടക്കുക. കേസ് സംബന്ധിച്ച വിവരങ്ങൾ കസ്റ്റംസിൽ നിന്ന് എൻഐഎ ശേഖരിച്ചുകഴിഞ്ഞു.
വാഗമൺ സിമി തീവ്രവാദകേസിൻ്റെ അന്വേഷണ ഉദ്യോഗസ്ഥനായിരുന്നു സി.രാധാകൃഷ്ണപിള്ള. കൂടാതെ കളിയിക്കാവിള ഭീകര ആക്രമണ കേസിൻ്റെയും അന്വേഷണ തലവനായിരുന്നു ഇദ്ദേഹം .കളിയിക്കാവിള കേസിലെ കുറ്റപത്രം എൻഐഎ ഇന്നലെസമർപ്പിച്ചിരുന്നു. ഈ കേസിൽ കുറ്റപത്രം സമർപ്പിക്കുന്നതുമായി ബന്ധപ്പെട്ട് ഇപ്പോൾ ചെന്നൈയിലാണ് അദ്ദേഹമുള്ളത്. കൊച്ചിയിൽ തിരിച്ചെത്തിയ ശേഷം സ്വർണക്കടത്ത് കേസിലെ തുടർനടപടി ക്രമങ്ങളിലേക്ക് കടക്കുമെന്നാണ് സൂചന.
ദേശസുരക്ഷയെ ബാധിക്കുന്ന കേസായിട്ടാണ് കേന്ദ്ര ആഭ്യന്തര മന്ത്രാലയം സ്വർണ്ണക്കടത്ത് കേസിനെ വിലയിരുത്തുന്നത്. രാജ്യസുരക്ഷയ്ക്കും, സുഹൃദ് രാജ്യവുമായുള്ള ബന്ധത്തിനും വെല്ലുവിളി ഉയര്‍ത്തുന്ന കേസാണിതെന്നും എൻഐഎ എഫ്ഐആറിൽ വ്യക്തമാക്കുന്നു.ഭീകരപ്രവര്‍ത്തനങ്ങളുമായി ബന്ധപ്പെട്ടുള്ള യുഎപിഎയിലെ 16,17, 18 വകുപ്പുകളാണ് പ്രതികള്‍ക്കെതിരെ എന്‍ഐഎ ചുമത്തിയിട്ടുള്ളത്. സ്വർണ്ണക്കടത്തിനു പിന്നിലെ ഭീകരപ്രവർത്തനവും അന്വേഷണ വിധേയമാകും. കേസിൽ മൂന്നാം പ്രതിയായ ഫാസിൽ ഫരീദിനെ വിട്ടുകിട്ടാനുള്ള ശ്രമത്തിലാണ് അന്വേഷണ സംഘം.
0 Comments