പിറവം: കോവിഡ് -19-ന്റെയും ലോക്ക്ഡൗണിന്റെയും പശ്ചാത്തലത്തിൽ പിറവം നിയോജകമണ്ഡലത്തിൽ സാമ്പത്തികമായി പിന്നോക്കം നിൽക്കുന്ന ഹൃദയ – വൃക്ക രോഗികൾക്ക് സൗജന്യമായി മരുന്നു നൽകുന്ന എം.എൽ.എ ആശ്വാസ് പദ്ധതിയുടെ രണ്ടാംഘട്ടത്തിന്റെ മരുന്നിന്റെ വിതരണോദ്ഘാടനം പിറവത്ത് അനൂപ് ജേക്കബ് എം.എൽ.എ നിർവ്വഹിച്ചു. എം.എൽ.എ മുൻകൈ എടുത്താണ് ഈ പദ്ധതി നടപ്പിലാക്കുന്നത്. രണ്ടാം ഘട്ടത്തിൽ സാമ്പത്തികമായി പിന്നോക്കം നിൽക്കുന്ന കാൻസർ രോഗികൾക്കും മരുന്ന് വിതരണം ചെയ്യും. ഇത്തരത്തിലുള്ള രോഗികൾക്ക് ഒരു പ്രാവശ്യത്തേക്കുള്ള നിശ്ചിത തുകയ്ക്കുള്ള മരുന്നു വിതരണമാണ് ഈ പദ്ധതിയിലൂടെ നടക്കുന്നത്. കോവിഡിന്റെയും ലോക്ക്ഡൌണിന്റേയും പശ്ചാത്തലത്തിലാണ് സാമ്പത്തികമായി പിന്നോക്കം നിൽക്കുന്നവർക്കായി ഈ പദ്ധതി നടപ്പിലാക്കി വരുന്നത്. 380 രോഗികൾക്കായി നാലു ലക്ഷത്തി ഇരുപതിനായിരം രൂപയുടെ മരുന്നാണ് ആദ്യഘട്ടത്തിൽ വിതരണം ചെയ്തത്. മരുന്ന് വിതരണ വാഹനത്തിന്റെ ഫ്ലാഗ് ഓഫാണ് എം.എൽ.എ നിർവഹിച്ചത്. BPCL ജനറൽ മാനേജർ അഡ്മിനിസ്ട്രേഷൻ ജോർജ് തോമസ്, IMA-യുടെ കോവിഡ്-19-ന്റെ കോർഡിനേറ്റർ ഡോ.ജുനൈദ് റഹ്മാൻ, വിത്സൻ കെ.ജോൺ, രാജു പാണാലിക്കൽ, അന്നമ്മ ടോമി തുടങ്ങിയവർ പങ്കെടുത്തു. എം.എൽ.എ-യുടെ രണ്ടു മാസത്തെ ശമ്പളവും ഇതിനായി നീക്കിവെച്ചിട്ടുണ്ട്.